مسطول
انا ماشى مروح بتطوح
رجليا يدوبك شيلانى
وببيباى للهم بإيدى
وبغيظو وأطلعلو لسانى
وبأتطوح ومروح
وبروح وباجى
فول أوبشن
ميت فل مزاجى
وبحسب إن أنا واحد اتنين
انا هوا. ولا أنا التانى
مسطول وبهلفط فى كلامى
متهيأ ليا وقدامى
فيه غابه وعالم كدابه
وكبيرها بياكل فى صغيرها
وطمعها بيقتل فى ضميرها
وناس تقوى وتيجى على غلابه
انا خايف أمشى لقدامى
أنا تايه بعد ماأنا شربت
انا هوا ولا أنا التانى
كده تمت كده منى تعبت
طب أنا تايه ولا كده وصلت
انا فايق ولا أنا مازلت
مسطول وبهلفط فى كلامى
وتهيأ شايف معلش
ناس خاينه بتلبس ميت وش
لا بتعمل فى حساب العشره
لا بذمه ولابقلب يحس
وبتمشى وبتنام مرتاحه
وبتقدر تخدع وتغش
وتدوس ولا تلمح غالى
وبتضحك بضمير وبنفس
وناس تتعب فى اللقمه عشاها
وتختار فى رغيفها الصبح
وناس طارشه الفكه معاها
دايرها ودايره فريش
الناس على بعض تعدى
ولاحد بحد بيحس
ماشين عالسطر القاسى
ومانعين القلب يحس
تعابين عايزين ليها حاوى
دايرين على بعض تفح
وتلاكيك فى الغلط تقاوح
ببجاحه وبرفع الحس
وتعبت عشان ماأفهمشى
وإشربت عشان مش أحس. ...عاميه مصريه
ليست هناك تعليقات:
إرسال تعليق