نقطة ورجع للسطر***
نقطة ورجع للسطر
ذاك الفاسد
عاد مْشَيطن مارد
يرد ما سرق...
نقطة ؤيتحط في الصفر
بَكًى لخلق بلا حشمة
دار فلوس ؤ ربى الطحشة
بل فرعن وهتر
ؤباش جمع السلطة والمال
ما ميز بين حرام وحلال
عاد طرزان وحقر الرجال
صنع الشناقة م حس م فكر
نقطة ورجع للسطر
ذاك الزيرو زاغ وداع
عافية شاعلة والجدر بعباع
حوش على رزق لمسكين...
بغا يجوعوا وحك على الدبر
نسى ان الرزاق الله
الواحد القهار لا سواه
وبدين الرحمة ووصاياه كفر
غلًظ لفُسًاد وصحاب الشكارة
ؤ لي عندو فيل زادو فيلة ب جهارة
داتو الغفلة للهاوية وحلل لمنكر
نقطة ورجع للسطر
ذاك لمجحوم حكموا عليه الدراوش
يمشي يزور راه ردو نقصو مهاوش
ؤ باش يكون عبرة ...
خاصو يرجع للصفر
حيت من مال لحرام عاد باسل
فقد لموري بات في دعاوي لبلا حاصل
ؤجامي تفرح للظالم....
ل بعرق الكادح تلهى وسكر
بل نسى الطيحة ولقبر
بزاف هما ؤ خاصهم التغربيل
اجلاف وصيادي لويل حيت ويل
عادوا علينا اسياد
قلال النية بغاو الخش ولعواد
دبا لَعْمارة خرْجًت بارودها
ربي عاميهم ما شفوها ولا سمعوها
نساوا شحال من فرعون بحالهم....
جامي زاد وفي لحفاري غبر
نقطة ورجع للسطر
***المغرب *** اشاعر والزجال: أحمد الكندودي ***
ليست هناك تعليقات:
إرسال تعليق