((إتفضلي))
عبدالله ساتي
عضو إتحاد شعراء الأغنية السودانية
(بالشعر العامي السوداني )
يالواقفة في باب الرويح
إتفضلي
خُشي القليب....
ماتخجلي
شرفيهو ياحليوة
وفوق النِبيض
إتمددي
فرغيها كل الحقائب
الشايلة ريدتك في دمايا
وأسكني
وإنداحي في رويحتي
وفوحي فيها بي العبير
الصندلي
سِدي طاقات المسام
مايدخل هوى غير هواك
شان أريدك
وتسعدي
لاعبي القليب
مرات حنان مرات جفا
مرات قسى
ومرات عليهو ياحليوة
إتدللي
سافري بيهو
هاجري فيهو
فرحيهو
جرحيهو
بس شرفيهو يازهرة
الروض الندي
إتفضلي
تلقي الحنان
تلقي الأمان
تلقي المنى
تلقي الغنا
تلقي شعر الريد
الشجي
إتفضلي
🎼🎷🎺🎸🎻🎨🎹
ليست هناك تعليقات:
إرسال تعليق