الاكاديمية العربية المغربية للشعر والأدب

!!،،الطب مهنة إنسانية،،!!

... بقلمى : د/علوى القاضى.

... الطبيب إختاره الله سبحانه وتعالى أن يكون سببا فى شفاء المرضى أو على الأقل تخفيف آلامهم أيا كان مذهبه أو عقيدته فهو أولا وأخيرا 

* إنسان *

... ولا يجوز بأى حال من الأحوال أن يستغل المرضى أو أن يكون  عبئا نفسيا أو ماديا عليهم  بأى حجة فيزداد مرضهم وآلامهم

... كل الشرائع تدعوا إلى فضائل الأعمال والأخلاقيات القويمة والسليمة التى تحكم العلاقات بين البشر إبتغاءا لمرضاة الله 

... أيها الزملاء والأحباب إرحموا من في الأرض يرحمكم من في السماء

... للأسف دا حالنا إلا من رحم ربي ، " بعض الزملاء " ولا أعمم  

. . المريض : كام الكشف يا آنسه

السكرتيرة : ٢٥٠ ج وعليه رسم قلب هدية

. . الدكتور : بتشتكي من إيه

. . المريض : باشتكي من آلام فى الصدر ونهجان وضيق فى النفس

. . الدكتور : تمام هاتاخد العلاج ده مبدئيا وتعملي أشعة تلفيزيونية على القلب ودى مقطعية على الصدر والتحاليل دى علشان نطمن وتعدي عليا بعد ٣ أيام

. . المريض : حاضر يا دكتور ، يعنى فيه أمل أعيش انا عندى أربع أولاد كلهم فى التعليم وأمهم ووالدتى ومالهمش حد غيري

... خرج المريض وهو مكسور ومنكس الرأس لاتقدر سيقانه على حمله وهو منهار بالبكاء لأنه لايستطيع أن يشتري العلاج ويستكمل الفحوصات 

... سألته والدته ماذا يبكيك ياولدى فلم يستطع الإجابة ولكنها شعرت به فدخلت فتحت صندوقا وكانت قد إدخرت فيه مبلغا من المال ثمن كفنها ومصاريف جنازتها تحسبا ليوم وفاتها 

... وأعطت إبنها كل المبلغ وقالت له وقتها ربنا هيفرجها ( ايمان العوام ) 

. . مركز الأشعه : الحساب ١٠٠٠ ج

. . معمل التحاليل : الحساب ٤٥٠ ج

. . الصيدليه : الحساب ٣٠٠ ج

. . المريض : بعد ٣ أيام لو سمحتي يا آنسه عندي إعاده مع الدكتور

. . السكرتيرة : تمام الإعاده ١٠٠ج

. . المريض : تمام إتفضلي

. . الدكتور : إيه يا بطل عملت إللي قولتلك عليه

. . المريض : أيوه يا دكتور إتفضل الأشعتين والتحاليل

. . الدكتور : عال عال الحمد لله كله تمام التحاليل والأشعات تمام وسليمة مافيهاش أى حاجة إنت صحتك زى الفل ، بس إنت محتاج قسطرة على القلب

. . المريض : الحمد لله ، بس ليه قسطرة يادكتور ، مش حضرتك قلت أنا زى الفل

. . الدكتور : والله رسم القلب بيقول إنك ممكن تدخل فى مشكلة فى الشرايين

. . المريض : طب لو إنتظرنا شوية ولو حصلت مشكله آجى لحضرتك نعمل القسطرة

. . الدكتور : واحنا لسه هانتستنى ، جهز نفسك يابطل علشان أعملك قسطرة تشخيصية الأول ، ونشوف النتيجة ، روح إحجز فى المركز ده (...)

. . المريض : الدكتور (...) باعتنى ، كام يا آنسه حجز القسطره 

. . السكرتيره : ١٥ الف ياحاج غير ثمن الصبغه 

. . المريض : حاضر يابنتى أروح أجهزهم وأجيلك

... وينادي المنادى في المساجد داعيا أهل الخير أن يتبرعوا لإنقاذ المريض الفقير

... وتم جمع المبلغ وذهب المريض وحجز القسطرة

... يعود المريض إلى الدكتور ومعه التقرير 

. . المريض : إتفضل يادكتور التقرير  

. . الدكتور : الله تمام مش بقولك إنت بطل وزى الفل الشرايين سليمه ١٠٠/١٠٠ إمشي على العلاج ده وأشوفك بعد شهر

. . السكرتيره : آلو مركز الأشعه الدكتور بيقول لكم بعتلكم ١٨٠ حاله الشهر ده ×٢٠% يبقى الحساب ٢٠ الف ج

. . مركز الأشعه : حاضر يافندم المظروف هايجيله بكره الصبح

. . السكرتيره : آلو معمل التحاليل الدكتور بعتلكم ١٧٠ حاله الشهر ده ×٢٥% يبقى الحساب ١٥ الف ج

. . معمل التحاليل : حاضر المظروف هايجيله بكره الصبح

. . السكرتيره : آلو مندوب شركة الأدوية الدكتور كتب الدواء بتاعكم لكل الحالات  والدكتور طالب أسبوع فى شرم الشيخ هو والأولاد

. . مندوب شركة الأدويه : تمام يافندم بلغى الدكتور إن الحجز تمام وأجازه سعيدة للدكتور والمدام والأولاد

. . السكرتيره : آلو مركز القسطرة حساب الدكتور ١٨٠ الف 

. . مركز القسطرة : حاضر يافندم المحاسب هيحول المبلغ على حسابه فى البنك

. . السكرتيره : أجانس السيارات ، الدكتور كان حاجز سيارة موديل السنه دى 

. . الأجانس : تمام يافندم جاهزه ييجى يستلمها 

... هكذا تُدار الأمور ويتم الإتجار بآلام وأوجاع الناس

... تحياتي لكم  ، وأسفي على الضمائر الغائبة

... ويستمر  الكادحون في المعاناة ويستمر المستغلون في اللامبالاة 

... إرحموا من فى الأرض يرحمكم من فى السماء 

... تحياتى ...