شابوا (العنوان على وزن أغنية بانو للشاعر صلاح جاهين وغناء السندريلا سعاد حسني)****
*************
شابوا
****
شابوا شابوا شابوا
ابدا ابدا ولا تابوا
ولا تعلموا من أي دروس
عايشين يكسروا بس النفوس
خلونا نخاف من بعض يا ناس
موتوا كل شيء حلو ومحسوس
يا عيني على غُلب الغلابه
وقعوا في مخالب الديابه
خلوا دنيتهم ولا الغابه
والسيد طلق كلابهُ
دنيا دايره ع الناس
طاحونه تهرس وخلاص
فين راحت بس الرحمه
امتى بس الخلاص
يا عيني ع الناس المحتاره
وقعوا في ايادي جباره
في الظلم آخر شطاره
آهو كل شيء بحسابهُ
يا عذاب اتشطر على غيرنا
على اصعب منك ياما صبرنا
لا عمرنا قولنا في يوم الآه
ولا المقادير قدرت تكسرنا
دم الناس ماصينه
والظلم شوفناه بعينهُ
وكأن شقانا عاشقينهُ
والبيت ناويين على خرابه
هم في وادي واحنا في وادي
بيقولوا يا شر كده وعادي
واحنا ملناش غير الدعاء
لرب عادل وهادي
هجروا نص الخلايق
والنص التاني متضايق
عايش حياته مش رايق
روقة الشايب واصحابهُ
يا وشوش بتعرف تكذب
تسرق تنصب تنهب
اساليب مبتكره وعالميه
بس على فين راح تهرب
دخلوا بالحنجل والمنجل
بتلات ورقات والمندل
لحد ما قعد واتقندل
بعديها كشر انيابهُ
جي المستقبل لينا
ما احنا بدمنا روينا
شجر الحرية سنين
من كدنا ودمع عينينا
ياما راحوا قبلكوا شطار
كانوا فاكرينها عمار
راحوا وطلع النهار
على بكره كاتب كتابه
ايام بتلف وتدور
وبكره يجي الدور
ضلمه على كل ظالم
وعلى كل مظلوم نور
خلوا السكينه سرقاكوا
عيشوا وابسطوا هواكوا
وارضوا شيطانكوا اللي غواكوا
كله هياخد منابهُ
الشاعر السيد حسن....
ليست هناك تعليقات:
إرسال تعليق