حاجات بسيطه وتفرق كتير
بقلمي جمال القاضي
حاجات كتير بسيطه وتفرق معانا كتير
لما تميل رأس ابنك اوبنتك على صدرك وتطبطب وتحط ايديك على او شعرها وتطبطب عليها تفرق كتير ، تفرق انك بتحسسهم بعطفك وحنانك وخوفك عليهم واحساسهم بانك فعلا السند لهم في حياته الصعبه وال كلها هموم
تفرق كتير لما تميل راس زوجتك ناحية قلبك وتسمعها دقاته وتاخدها في حضنك وتحسسها معاك بدفئك وحنان قلبك ومعاه تحس بالأمان والحب وعدم الخوف وكل تعب وقتها مع الشعور ده هيروح ،
ربنا خلق جوانا قلب وله وظيفة وكلنا نعرفها وهي انه بينبض علشان بيضخ الدم للجسم كله ، لكن له وظائف تانيه كتير خارج الجسم ، منها انه كمان زي مابيضخ الدم للجسم بيضخ معا الحب لابعد من الجسم وخارج الجسم كمان ، ومعاه تتغير حالات الانسان النفسيه مرة بيفرح لما بيكون مبسوط وراضي ومرات بيحزن لما يكون غضبان ، قلبنا هو ال بيخلي المخ يترجم الشعور من حزن لفرح والعكس
ولو حبيت ترجم حبك لافعال ومتتكسفش ، اكتر شيء بنعاني منه كشعوب عربيه اننا بنحب ونخاف نعترف بالحب حتى لزوجاتنا واولادنا ونكتفي بابتسامة رضا او فعل يدل على مشاعرنا ، الناس دي مش محتاجه فعل يخفي جواها حبك ، محتاجه الكلمه الأول وبعدها فعل يأكد المشاعر ، لإن لو مااظهرتش حبك لهم قلب الطرف التاني هيبحث عنه بعيد عنك وساعتها هتسأل نفسك هي عملت كده ، هو انا قصرت في حاجه وأسئله كتير تانية غيرها ، ومع أولادك هتسأل اسئله تانيه ، هم عملوا ليه كده ،هم اولادي ليه بيحبوا غيري اكتر مني ويفضلوه عني ،
متستغربش اه انت بتحب كل دول بس فين مظاهر حبك وانت كل حياتك تعلي صوتك وتشتم فيهم على الفاضي والمليان ، فين اللمه وانت وسطهم ، فين الكلام الحلو ال قلته لهم فين ابسط الهدايا ، فين الفسحه البسيطه حتى لو نزلت تتمشى معاهم في الشارع ال انت ساكن فيه من غير اي تكلفه ، فين الضحكه والابتسامه الحلوه بتاعت زمان وال اول ماكنت بترجع لبيتك من شغلك كانوا بيشفوها على وشك واولادك او زوجتك بيفرحوا معاها لفرحك ، فين كلمة وحشتوني او وحشتيني ، فين كلمة مش شايفك طول النهار وحاسس اني من زمان ماشوفتك ، فين كلامك بمعلش معرفتش اقعد معاكي اليوم لان كان عندي ضغط شغل ، فين كلمة معلش انا عارف انك تعبتي طول اليوم من شغل البيت ، فين لازم ترتاحي علشان تعبتي وانا هعمل الحاجه دي ، لكن للأسف اتربينا على خوف الإفصاح عن المشاعر بحجه ورثناها مع مفهوم غلط وهو اننا لو عملنا كده هيبتنا ورجولتنا هضيع مننا مع ان العكس الهيبة والرجولة مش كده ، مش الرجولة انك تفرضها على اهل بيتك بالامر والنهي ، ورسولنا الكريم خير قدوة في مساعدة زوجاته وتعامله معهم، لكن علينا اننا نتعلم اصول الدين كويس ونقرأ ، ولازم تعرف ان احترام الغير لك هو من معكوس لأصل احترامك لهم وتقديرك لإحتياجتهم النفسيه والشخصية وإظهار حبك لهم بالكاام والفعل مع بعض .
ليست هناك تعليقات:
إرسال تعليق