الاكاديمية العربية المغربية للشعر والأدب

فين ضحكتي .. 

ولا تاهت وسط الزحام.. 

فين ضحكتى الي كانت بتفتح ببان.. 

ببان مفتوحة على الضرفتين.. 

ضحكة كانت تبكى العنين..

ضحكة مرسومة على الوش.. 

من غير غش.. من غير ملام.. 

آه من دنيا الاوهام.. 

أصبحنا اغراب.. 

من بعد ما كنا أصحاب مكان.. 

بس انا جوايا حلم...  

نفسي اضحك.. نفسي ابتسم 

نفسي ترجع الضحكة.. 

الي كانت تضم.. 

          الخال وي العم.. 

مين ينسى السند.. الأب 

مين ينسى حنان... الام

ضحكتهم كانت تنسينى الهم.. 

فين خالي.. وفين عمي.. 

آه  لما كنت أضحك.. 

كان يضحك زماني.. 

يدندن.. يغنى.. 

كانوا يحتاروا.. فى سني..

أبقى تلاتين.. يقولوا عشرين 

يا دنيا ليه قلبتي الموازين.. 

طيب ما أحنا كنا عايشين.. 

كنا بالشقى والغلب.. راضين

حامدين.. شاكرين.. 

ضحكة كانت من القلب.. 

حتى لو كان موجوع..  

حتى لو الجيب فاضي.. 

ومتنا من الجوع.. 

ضحكة طالعة من غير رجوع.. 

ضحكة صافية..

                ضحكة دافية..

ضحكة كانت تسهل الصعب 

تفوت فى الحديد.. 

كنا ايد على ايد.. 

ضحكة كانت تصحي الأمل البعيد.. 

ومن بعيد شايف غدر الزمان.. 

الدنيا قلبت ظلام.. 

مات الحلم.. وهو لسة جنين.. 

الدمعة فى العين.. بتقول كلام 

آه منك يا دنيا الأوهام.. 

فين ضحكتي.. 

           ولا تاهت وسط الزحام.. 

فين ضحكتي..  ج ١

بقلم  / يحيى المنياوى