كون سبع وكولني
مايهمك نهيق ونباح
مايخلعنا ظلام وشباح
ياصاح ياصاح
هني خاطرك ورتاح
تزدنا فنهار البرق والرعيد
مايهنتا إل يهظرو ويقولو
السبوعة خارج الغابة كيصولو
لاشفتي الوحش التهرب قصظو ومشيلو
راه يحسبك بحالو واعر وشديد
صاحبنا القلم وعاشرنا أوراق ودواية
وبعدنا وهجرنا القوالا والدواية
ياصاح مال حكايتك حكاية
ما عندها بداية ولا نهاية
وعنوانها راه فريد
لاتهظر فينا بكلام مظرݣ وخافي
راه عمنا فبحر الكلام والقوافي
وقطعنا البحر وجلنا الثرث الخالي والفيافي
واش نسيتي ياصاح احنا ݣاع ولاد أتاي وخبز حافي
ولبسنا الميكا والبالي فالعيد
كون سبع وكولني والله إيجيبنا فالصواب
كون سبع وكولني السبع ماشي بالنياب
السبع راه بالكلمة والشدة يتصاب
براكة ماتقاقي علينا بحال الدجاجة
دخل الميدان واراك الفراجة
ورد موراك الباب
أنت فكل لبسة تبدل المشية
وتزوق دوك الخطوات
ولبستي طانݣة أمي رقية
وخيالك عاق بشلا حركات
مالك ياصاح تبدلتي علي
الزواق فالمشية خليه البنات
كون سبع وكولني والله إيجيبنا فالصواب
ياصاح احنا ولاد أصل واللوحة والكتاب
عبد اللطيف ميصر 5 7 2023 المغرب
ليست هناك تعليقات:
إرسال تعليق