زينها زين بلدي
مطبوع بطابع لوشام
ولباس حشمة نقي
والخلخال يرن بأنغام
وسواك حرو يݣدي
والبسمة خمر مدام
والݣعدة الهم تنسي
والحديث يفوح بأنسام
والقفطان توبو هندي
والسالف مݣرون بالتمام
بهواها قالو أنا مرضي
وعبد ليها أنا وخدام
هي مولاتي سلطان قلبي
تآمر غير بنضرة بلا كلام
الحنة فرجليها تكوي
والمشية مشية حمام
شعرها اكحل يسطي
غير ليل خيم وظلام
عينيها تخطف وتسبي
تسحر بداك لبسام
عينيها كوحل صردي
إيصيح بالشوق والغرام
الشعر بارود والعين فردي
غير بنضرة جابوني تمام
وغرامي راه تطلق يجري
واصبح قلبي برݣي وهي علام
إل شافها بزينها يهذي
وعقلو ايفرتح يقطع اللجام
المقراج حداها يغلي
والبراد يتسنى وسط الزحام
في إيديها عنبر يغوي
كاس أتاي امشحر بقوام
كاسو راه لعقل يدي
ايخليك تغيب تعيش فأحلام
وطبݣ حداها مسدي
غير ݣرݣاع وتمر الشام
إل بغاتها أنا نشري
عليها أنا نخوي البزطام
لا تلومو طباع قلبي
وحالو فالحب والغرام
ياك كلها فطريقو يمشي
أو إيطير إيعلي فغمام
أنا مفاهم مع قلبي
سالينا سالينا وسالا لكلام
عبد اللطيف ميصر 5 7 2023 المغرب
ليست هناك تعليقات:
إرسال تعليق