أنا الساقي أنا الݣراب صديق اللكحان والعطشان
لا تحݣر توبي بالشوفة أو كلمة حمقة ومخطوفة
ولا تخطأ فالصواب
لا تحݣر لون الجلباب لونو أحمر وطني فيه
ريحة أرض وتراب
خود من كلام الݣراب خود حكمة ماتلقاها فكتاب
الݣراب بوهالي قول مجذوب ݣربة على ظهرو بين
زناقي ودروب
إيقلب على قلب من المحبة لكحان قلب نكراتو
وهجراتو قلوب
قلب بالوحدة كيدوب يعطيه كاس من الݣربة ينسى
حالو ويتوب
أنا الݣراب أنا الݣراب واهيا الحباب
أنا الݣراب أنا الݣراب أنا هو الساقي
كاسي حكمة و صواب ودواك وراقي
لا تتكبر يا جاهل ومن العلم عطشان
برد برد وخود كاس فيه حكمة مايعبرها ميزان
لاتتكبر لاتزيد خيالك فالطول
مسيرو الغروب ويروح يزول
لاتيق فالدنيا ومن عشقها مهبول
ولاتنسى أصلك يا ولد الأصول
لاتجري ورا الدنيا طريقها ماعندو حد فالطول
أنت قلبك بالدنيا عطشان تعالى خود كاس راحة وأمان
راه الدنيا عندها جوج طرقان طريق كذوب وفوحان
وطريق كلو خطية وخسران خود كلمة من كاسي
كاس بارد وݣاسي يروي ويشفي غليل العطشان
حالك طير نومي ونعاسي حالك ياداك. الإنسان
بقيتي بين أحلام وأوهام فالمرابا حالك تواسي
تقتي فالدنيا والزمان القاسي تقتي فيهم ودرتي لامان
تيق فالصبر وشد فالله واياك من الشيطان وغواه
شحال من مغرور امشى وراه
وبين عشية وصباح ألقى كلشي امشى وراح
وما نفعو ابكى ونواح فاق من أحلامو
ألقى الشوك فراشو وغطاه
عبد اللطيف ميصر 5 7 2023 المغرب
ليست هناك تعليقات:
إرسال تعليق