بقلم ( أيمن نصر )
*****************
أصلك أصيل يا جدع
سيبك من الأوباش.
اللي باعك خسيس
باع الدهب ببلاش.
فيه ناس في صنف البشر
تعلي ف اللي ميسواش.
بكره الزمن يا جدع
يدي الدروس ببلاش.
إلجأ لربك يا جدع
وارضى ولا تنساش.
كل الخلايق يا جدع
من غيره ما بتسواش.
ده اللي تملي يقصده
هو اللي فعلا عاش.
واوعى في يوم م اليأس
لتروح والله بلاش.
ليه صوت البكا يا جدع
جوه القلوب متحاش.
ليه دمعتك تتخنق
وجوه الجفون تنحاش.
جبل همومك يا جدع
ليه عالي مبيوطاش.
طوح همومك يا جدع
على اللي ما بينساش.
حلمك أكيد يا جدع
لسه معاده مجاش.
بكرة تروق يا جدع
مش كل الحياة أوباش.
واوعى تقول يا جدع
راحت حياتي بلاش.
ولا تقول وقتي خلص
فيه لسه حياة تتعاش.
أكيد أكيد يا جدع
فيه قلب مابيخلاش.
بس انت دور يا جدع
تلقى النصيب متحاش.
يفرح بيك يا جدع
والحزن كإنه مجاش.
بقلم ( أيمن نصر )
دمتم في رعاية الله.
ليست هناك تعليقات:
إرسال تعليق