بقلم ( أيمن نصر )
****************
على فين واخدني
يا باش شويش.
حلمك عليه يا أحلى شاويش.
إنت أكيد متعرفنيش.
محضر تحري و كمان فيش.
إيه بس جنايتي
يا أحلى شاويش؟!
عاوز بياناتي عشان الفيش.
خد عندك بيناتي
يا أحلى شاويش.
الإسم مصري وكتير منسي
و أكيد قابل للتهميش.
السن... عجوز
من كتر البهدلة و التلطيش.
العنوان تحت الكوبري
و فوق أي رصيف.
و بالتحديد السُكنه مفيش.
المهنة... عاطل بيحلم يآكل عيش.
المؤهل... إتعلمت حاجات كتير
غير النصب و التهبيش.
و في خانة الديانة
إكتب يا شاويش
المذكور مسلم حقيقي
مش درويش.
وفي خانة الحالة الصحية
إكتب يا شاويش
المذكور مجنون بحب مصر
و غيرها مفيش.
و في خانة الصحاب
إكتب يا شاويش
صاحبي دراعي غيره مفيش.
وفي خانة الأملاك
إكتب يا شاويش.
تلاته مليار ضاعوا جميعاً
في البقشيش.
فاضل منهم صندوق خشب
مليان ورنيش.
بلمع جزم واشغل وقتي
وباكل عيش.
وفي خانة الأبناء
إكتب يا شاويش.
يوجد خمسه من الحرافيش.
و في خانة السياسة
إكتب يا شاويش.
بتوع السياسة ما شفونيش.
بس أكيد العذر معاهم
أصل نظرهم شيش بيش.
وفي خانة الملحوظات
إثبت يا شاويش.
إن كل حقوقي ما وصلتنيش.
آسف تعبتك يا أحلى شاويش.
في المحضر و كمان الفيش.
بس أمانة عليك يا شاويش.
إوعاك تكتب جوه المحضر
و جوه الفيش.
جيب المذكور كان جواه
طن حشيش.
بقلم ( #أيمن_نصر )
دمتم في رعاية الله.
ليست هناك تعليقات:
إرسال تعليق