بقلم ( أيمن نصر ).
*****************
الحلم ده حلمي .
سافر و لا جاشي.
مع إني مستني.
ع الدكة يا عمي.
متعشم أنا في حلمي.
يعود ما يخلاشي.
على صاحبه ميقساشي.
ده أصيل ما ينساشي.
صاحبه اللي إتقتل بدري.
و عمره ما عداشي.
مستنظره يعدي.
و برده ما عداشي.
و كفنوه بدري.
وكفنه ما جاشي.
حزنت من قلبي.
وحزني مخلاشي.
يا صبر صبرني.
يا عزمي قويني.
يا غربتي في بلدي.
حلمي ضيا عيني.
سرقوه قصاد مني.
و بغيره مارضاشي.
راسمه بإحساسي.
كله هنا في راسي.
مرسوم في كراسي.
في ضياعه ده خلاصي.
يوم سرقته مني.
ده يبقى يوم همي.
حزني في كبدي.
ساكن دروب قلبي.
قنوع أنا و راضي.
بجيب مليان و فاضي.
لكن محال أيأس.
و اضحي بأفكاري.
يا بكره يا اللي جاي.
نفسي ما تعماشي.
عن حلمي اللي ماجاشي.
وتسوقه هنا عندي.
و عمرى قصاد حلمي.
و عمري ما يغلاشي.
أمانه يا دموعي.
نفسي تفارقيني.
وإياكي بقى تخشي.
في النني تبكيني.
دي دموعي تكفيني.
لبحور تغرقني.
و لجزيره ترميني.
و يأس يكويني.
و اليأس مهوش مني.
ده اليأس غريب عني.
ده ضد تكويني.
ده اليأس يمحيني.
و الصبر ينجيني.
لحلمي يعديني.
عدي يا ليل عدي
بكره هيجي بدري
و معاه نور فجري.
عشمان انا ف ربي.
ألاقيه هنا عندي.
يا سارقين حلمي.
لأنكش على حلمي .
بالقلب و النني.
في الإنس و الجني.
في شروقي و غروبي.
في شمالي و جنوبي.
في قلبي و عروقي.
في شوارعي و دروبي.
في شطوطي و بحوري.
في فرحتي و نوحي.
في ليلي و نهاري.
حتى في أفكاري.
في عيون محبوبي.
لحد ما يجيني.
واشوفه بعيوني.
بقلم ( أيمن نصر )
دمتم في رعاية الله.
ليست هناك تعليقات:
إرسال تعليق