بقلم ( أيمن نصر )
******************
مهوش وزير ولا نجم شباك .
ولا مغني له صيت هنا وهناك .
ولا عمرة جاب ميدالية أولمبية .
و لا صورتة مرة نزلت بالغلط
في الجورنال.
مهوش ملاك ولا نبي
ومهوش ذكي ولا غبي
أبسط إنه يكون له معجبين
أو حد يفتكره.
أبسط إنة حتى يتعزم في أي مناسبة .
مالوش صحاب مهمين من الباشوات .
موظف صغير في هيئة حكومية .
ٱجمالي ما يتقاضاة الفين جنية وربعمية .
أقصى أمانيه إنة ميتحوجش لحد .
أقصى أمانيه ميتكسرش قدام عياله .
أقصى أمانيه صبره ما ينتهيش .
أقصى أمانية يبطل يقف في الطوابير .
أقصى أمانية يفلت
من مليون محاولة إغتيال.
قصداه هو من غير سبب
من غير ما يعرف هو مستهدف لية
بيحاول يفلت منها كل يوم
وكل ساعة و كل ثانية.
و هو مش عارف جنايته إيه !!
وعشان خاطر عياله
فكر ينجو بروحة من الحياة
فكر يلبس واقي الرصاص
يلبسه كل مايقف في أي طابور .
يلبسه كل ما يفتح التلفزيون
ويوعدوه بأن الدنيا وردية
وإن الأزمات معدية.
يلبسه كل ما يخش أي صيدلية.
يلبسه كل ما يخش أي سوق.
يلبسه كل ما يدفع فلوس
الدروس الخصوصية.
يلبسه كل ما يخش
أي سوبر ماركت.
يلبسه كل ما يخش لبياع الفراخ.
يلبسه كل ما يدفع أي فاتورة.
يلبسه حتى في الراحة والمنام.
ويدعي ربه إنه يعدي من الغيلان بسلام .
ولما إتسأل ليه تلبسه ساعة المنام
قال خايف يطلعولي في المنام
اللي بيحاربوني من زمان
بلبسه ضد كوابيس الحياة
وبلبسة ضد كوابيس المنام.
من حقي أعيش في سلام
مين عملني خصم في معركة
مين غير ما يسألوني حتى سؤال
مفيش حروب في الخفا
من غير ما اعرف إمتى قامت ؟!
و ليه ابتدت ؟! وإيه الهدف ؟!
ومين أطراف المعركة ؟!
منيش عدو لأي حد
وبحب الخير لكل حد
لية كل ما امشي ألاقي سد
وهيفيد بأيه بس الشكا.
سيبوني أعيش الحياة
سيبوني أعيش المعركة
في صدري لابس واقي الرصاص
يمكن يكون فية الخلاص
ولحد آخر نفس
هافضل أجاهد ف الحياة
وأكيد أكيد هيتقلع
واقي الرصاص
لما تيجي ساعة الخلاص.
بقلم ( أيمن نصر )
دمتم في رعاية الله.
ليست هناك تعليقات:
إرسال تعليق