بقلم ( أيمن نصر )
*********************
عاوزه إيه يا بنتي قولي
يا ام توكة بفص لولي.
عاوزة ربع جبنة رومي
عاوزة ونش يشيل حمولي
عاوزة مسحوق يغسل همومي
وهاتلي رابسو ينضف هدومي.
هاتلي تمن جبنة بيضا
وهاتلي ساحر وشيخ طريقة
لأجل الفقير ما يبقى صيدة
هاتلي جامع.. وهاتلي ميضة
ينضف القلوب المريضة
هاتلي سكر نبات فرش
اللي ياكله يكون بوش
وش واحد مش ألف وش
حتى لو قضاها غش.
هات ملبس وهاتلي توفي
هاتلي ناس جديدة نوڤي
ناس تردلي معروفي
ناس تطمن... يشيلوا خوفي
ناس تشدني من كفوفي
هاتلي بن لقهوة سادة
هاتلي قلب حبه زيادة
هاتلي خميرة للسعادة
هاتلي قلب يصون يعمر
هاتلي حلم لونه أخضر
هاتلي عمر يكون مسكر
هاتلي لسان مايقولش عيبة
هاتلي قلب محشي طيبة
هاتلي قلب مافيهوش جراح
هاتلي حضن فيه براح
هاتلي سبرتو ولتر جاز
وهاتلي صحاب كانوا عزاز
هاتلي روح نعناع وموز
هاتلي إنسان يمكن يجوز
لساه أصلي مش أراجوز
عاوزه كيس مليان ضمير
عاوزة ناس تكره تغير
وهاتلي طيبة وحنان بالطن
وهاتلي أصل وناس بتحن
وهاتلي هون وكمان كمون
وهاتلي شيكولاتة وبونبون
وهاتلي عشرة مش بتهون
وهاتلي ناس تكره تخون
وهاتلي كراس وقلم رصاص
وهاتلي بلاص من الإخلاص
وهاتلي وفا م البرميل
وهاتلي رحمة م الزنبيل
وزود منها كمان كف
يمكن ساعتها دموعي تجف
وهاتلي عشرة ما تتباعشي
تغلى أكيد مترخصي
وهاتلي أصالة م الأصلي
يمكن أعرفها لناس عصري
وهاتلي برطمان كمان فاضي
أحوش بركة م الماضي
وهاتلي حظ يغير حال
يعدل البخت اللي مال
وهاتلي فدان راحة بال
وعبي منها حتى شوال
وهاتلي شوال صدق أصلي
وهاتلي قلب صافي حصري
وهاتلي إبرة وخيط لكليم
وهاتلي قلب يكون سليم
وهاتلي دنيا فيها لسه
القلوب لساها حاسه
وهاتلي كسبرة للتقلية
وهاتلي ناس تكون وفيه
وهاتلي وقت جميل وعدى
وهاتلي نوم ع المخدة
وهاتلي عيون ماتدمعشي
عشان المر ما يدومشي.
وهاتلي قرطاس م الأمان
وهاتلي صبر قد الدكان
يمكن ساعتها أعود إنسان.
بقلم ( أيمن نصر )
دمتم في رعاية الله.
ليست هناك تعليقات:
إرسال تعليق