ــــــــــ ياداخل بين عيلتين ـــــــــــ
ندهوني الناس ندبوني في عاركه
مابين عيلتين مهاويس
وياداخل بين عيلتين ماينوبك
غير تقطيعك زي هريس
أنا قولت ومالوا مادام الصلح بيجمع
نكسب فيهم حسنه
وحكمت مابينهم زي ماقال الشرع
حدفوني بقرع ولاد الإيه الملاحيس
فقلت كفايه عليا بهيه
وهيه لسانها يصد جيوش
ف مالت لي قالت لي إش جابك
دولا تيران وجحوش
إياكش يروحوا المركز
ياخدوا طريحه جميعا ف الكراكون
وإياك تتجنن تاني وتيجي تحجز
بين عيلتين وتحوش
أنا قلت خلاص حرمت ياست بهيه
رفعت الرايه
ومعدتش أبدا أبدا هاعمل سبع
وهارمي النخوه ورايا
مادام الوضع الحالي البالي مرير
وبينشر فينا الداء
أنا هاكتب بس حروفي عن الأخلاق
وهاسيبها لسيرتي مرايا
ــــــــــــــــــــــــــــــــــــــــــــــــــــــــ
بقلمي الفلاح الفصيح /معوض حلمي
منشأة بطاش /تمي الأمديد / دقهليه
ليست هناك تعليقات:
إرسال تعليق