زجل...
سلك احسن لك
أزمان كشر انيابو
جهلت كلابو
ضعافت ذيابو
شع الحق ما بقى يتصاب
لمسكين والف عذابو
سعدات لفاقد اصوابو
اسوال خاصم اجوابو
كيف نكونوا أصحاب؟
وغير سلك احسن لك
لقالب يبقى قالب
او الدكة تطلع دكة
ازيادة فيه قالب
شتات لمجمع او لبركة
غاب لعار...الحق أصبح مار
تزورات الضحكة
غير سلك احسن لك
هذا وحدو يهمس
هذاك والف يتكرفس
لآخر تخنقت فيه النفس
ولينا كلها او دواروا
كلها دائر بشوارو
غير سلك احسن لك
لصانص شعل نارو
لمازوط أعلى من عارو
واواو على روينة
شحال جاتنا زوينة
خوينة الثلاجة
ما بقينا ناس لمدينة
ريبنا لكزينة
غير سلك احسن لك
عقلي انا تصدم
بغيت غير نفهم
لخالق يغفر يرحم
بنادم في خوه
أحكم او اعدم
غير سلك احسن لك
ليام هرمات او شرفات
لموت فينا خاطفة
بحر ازمان عايقة عارفة
لخبز ولات عليه لمناتفة
غير سلك احسن لك
أحبوا نبانوا فاص افاص
نعرفوا لمخصوص من الخاص
شحال من شان ليوم ارخاص
شحال من ضايع بلا اخلاص
غير سلك احسن لك
اجيوا نجمعوا لحلقة
نبحثوا ورقة بورقة
نوعيوا ليام لحمقة
غير سلك احسن لك
نمحيوا زواق برة
نحروا لحمامة لحرة
نقسموا بيناتنا الجرة
وغير اجيوا هاذ لمرة
ابراهيم اللغافي
ليست هناك تعليقات:
إرسال تعليق