بقلم ( أيمن نصر ) .
******************
والتقيتك في الشجر و الطير .
التقيتك عكس خط السير .
الورود من خدك تتعطر .
و البلابل طايرة تتمخطر .
أندهك ....الربيع يتحضّر .
إنتِ هنا دلوقت
ولا موجودة من الأول .
الشجر من فرحتة بيتصّنت .
و النسايم المسعدة هَلت .
الشجر ليه قَلب على لِبلاب .
الشجر بيحاوطنا زي الأحباب .
والشمس بعتت صهدها مشوار .
احنا في أغسطس ولا آزار .
التقيتك في الزمان السعيد .
انا اللي جنبك هنا
ولا مولود جديد .
القمر زارنا
ولا لساه عالي بعيد .
التقيتك فوق و لا هنا .
المكان ف الارض ولا ع السما .
والزمان الآن ولا من قبلين .
انا التقيتك كتير قبل كدة .
كل حتة في جسمي متأكدة .
يا أميرة و قاعدة متسيدة .
اللقا دة حقيقة ولا خيال .
قلبي واقع ليه لمطرح الخلخال ؟!
قلبي واقف ولا بيجري؟!
قلبي مش كان هنا جنبي ؟!
نَفَسِي واقف ولا عمّال يِجري ؟!
وضحيلي ليه بنهَج وانا واقف ؟!
حاسس بفرحة ولا انا خايف ؟!
وضحيلي التراب ليه أتقلب بستان ؟!
وضحيلي الهوا
مين عَطره بعطر ريحان ؟!
التقيتك النهاردة
ولا في الزمان اللي فات ؟!
انا القتيل المتيم
ولا الشهيد اللي مات ؟!
يا قريبة من السما والارض !!
يا حبيبة زي الصلاة والفرض .
خلي بيني وبينك المرسال .
والكلام أحوشه لساعة المقال .
كل كلمة راح أقولها بحنية
إنت ملاك أصلاً ولا جنية ؟!
وضحيلي الجاية والرايحة .
واكتبيلي الهنا في ميت صفحة .
يا جميلة حتى بالطرحة .
بَدلِيلي مرارة الأيام .
يا عزيزة زي حضن الأم .
كل شيء من غيرك حالة يغم.
عطشان وانت السبيل و اليَم.
اوعديني ان الفراق مش لينا.
و اكتبي ع الشجر أسامينا .
اوعديني إن الوفا انكتب لينا .
اوعديني اننا نشيخ مع بعض.
فكريني ان حبنا أصلاً فرض.
هو زادنا ولبسنا والأرض .
هو أولى في كل ساعة.
والحقي هاتيلي السَماعة .
وأسألي القلب اللي عمال يُدق .
هو كاذب ولا بيصدق .
ازرعيني في قلبك زي النخيل .
واوعديني إن قلبك تملي يميل .
إوعديني إن الفرح آتي .
قلبي قلب لدكان ساعاتي .
كل شيىء جواية عمال يدق .
آه... نسيت أقولك بالأحق .
حبك فات ف القلب شق .
بقلم ( أيمن نصر )
دمتم في رعاية الله.
ليست هناك تعليقات:
إرسال تعليق