بقلم ( أيمن نصر )
*********************
يا أم الخطاوي المؤمنة
الجنة عنوانها
ليه بس يا مؤمنة
قشعرتي في بدنّا
يا أم العزيمة الطيبة
دمعتي ليه عيونّا
أول طريقك رضا
وآخر الطريق جنة
ليه بس يا طاهرة
زودتي أشواقنا
إنت اللي ماشية هناك
ولا ملاك جالنا
ماشية وشايلة حمول
تفوق ف أوزاننا
مفيش يأس هيوصلك
اليأس ده صابنا
مفيش وقوف ورجوع
في آخر الطريق جنة
ماشية في عز الحر
و لربها مسافرة
ومهما تشوف ف صعاب
بتطوي الطريق معافرة
ده كل خطوة برضا
وآخر الطريق جنة
يا أم الحمولة التقيلة
زودتي أحمالنا
ضربتي ليه السارينا ؟!
صحيتي في كسلنا .
أول دروس العزيمة
منك علاشانا
يا أم الحمول التقيلة
جددتي ف آمالنا
دي خطوتك ديا
درس لأجيالنا
ننوي النية السليمة
والعزم دة حالنا
يا أم الخطاوي المؤمنة
حجيتي كام حِجة ؟!
دة كل خطوة برضا
وكل خطوة بمدنة
يا أم الحمول التقيلة
ضربتي ليه السارينا ؟!
وجددت أشواقنا
كنت إنت أول سفيرة
في الحج و العمرة
وانكتبتلك بخطوة
في البدر و القمرة
أم العزيمة السليمة
الأولى في المَقصَد
يشهد عليكِ الطريق
والحر و الشيلة
دة كل خطوة برضا
وكل خطوة برحمة
يا أم الخطاوي الجميلة
المؤمنة الطاهرة
منك عرفنا العزيمة
والقصد و النية
يا أم الخطاوي المؤمنة
الطيبة الطاهرة
إخلاصك راح للمدينة
والكعبة بتقرب
كل اللي شافك بكى
والقلب متكهرب
السما ضللت علينا
والأرض بترحب
دة كل خطوة برضا
و الحلم بيقرب.
آخرة طريقك رضا
و الكعبة بتقرب.
بقلم ( أيمن نصر )
دمتم في رعاية الله.
ليست هناك تعليقات:
إرسال تعليق