دموع الشمعة#رؤيةAlfaromeo#زجلية مغربية#
ياالشمعة !
قولي علاش كتبكي ؟
واش هو الفراق لي شواك ؟
كيف ماشواني !
ولا على عمرك لي فاني ؟
مالقيتك غير نتي نحكيلك همي،
ودموعي تشاركيني،
كنتِ زمان،
ملي كان الزمان،
يفرح للولهان،
كتشاركينا فرحتنا،
وفكل جلسة تسهري علينا،
بلا مادموعك تأثر فينا !
وشحال على ضوك سهرنا وحلمنا،
وشحال بدموعك لعبنا وضحكنا،
سمعنا حكايات،
وصدقنا روايات،
وفنورك على الوفى تعاهدنا،
صدق كولشي فحال دموعك،
كدوب كتدوب ،
ووردة دابلة فْالرّْكْنَة !
وكلام كان كولو غير مْغْنَى،
جاوبيني دابا ياشمعتي،
باش فادتك دموعك ؟
وباش فادتك الْمْحْنَّة ؟
وباش فادك نورك ؟
لي فظلام الهجران،
مابقالو معنى !
غير دوبي ياشمعتي،
وغرقي فدموعك،
يمكن سيل دموعك،
يطفي نار قلبي، وْنْتْهْنَّى !#رؤيةأعراب#
ليست هناك تعليقات:
إرسال تعليق