علاش يالليل ؟#رؤيةAlfaromeo#زجلية مغربية#
علاش يالليل لجرحي،
مابغيتي تداوي ؟
واش عاجبك سهري ؟
ولا أنت لدمعي غاوي !
حسبتك رفيق،
والرفيق مايغدر صاحبو،
شحال داب عليك شمعي،
ونجومك مابغاو يتحسبو !
علاش يالليل،
لجرحي مابغيتي تداوي ؟
سهري فيك يطول،
وانت كيف الغول،
على خلا زماني ناوي !
حببتيني فالسهران ،
ومابقى نعاسي فعيوني ساوي،
عشمتيني فدوا النسيان،
وشربتيني من كاس خاوي !
علاش يالليل علاش ؟
قلبك هاكدا بارد وقاسي ؟
فوقاش تشرق شمسك فوقاش ؟
والا أنت بحالي،
فدفى الشمس زاهد،
ولشعاها ناسي ؟
عييت مانقصر فيك،
مابغيتي تقصار،
وعلى جرحي كيف الجرار،
طالع نازل تحفر، وماتواسي !
واش حيت طبعك بحال هواك غدار ؟
والا أنت بحالي يامسكين،
قلبك بالهم ولى لاوي ؟
إحكي يالليل همك فحكاية،
يمكن فسطورها نجبر دوايا،
إحكي يالليل،
ولا تخليني كي لهبيل وحدي داوي،
وقولي علاش،
لجرحي مابغيتي تداوي !#رؤيةأعراب#
ليست هناك تعليقات:
إرسال تعليق