الاكاديمية العربية المغربية للشعر والأدب

ساعة عصرية 

حكاوي بالعامية 

الحلقة السادسة عشر 

بقلم : محمد فتحي شعبان 

أهلا وسهلا بحضراتكم اتفضلوا والله لتقعدوا اللمة حلوة ،

تحس كدة بلمة العيلة والدوشة اللي بيبقوا عملينها ، والعيال اللي بتصرخ وتصوت وبس يا واد اسكتي يا بت ، 

ألحق يا حسن اختك حتقع من البلكونة وحسن يقوم يجري والبت هند تصرخ ومش عايزة تنزل من علي البلكونة ،وام حسن تقوم تجيب هند وتقرصها من ايديها ويا بت الل....اترزعي هنا جنبي ...وسعاد وثناء وسوسن واخدين جنب وبيرغوا جابوا سيرة أمة لا إله إلا الله طبعا انتو عارفين قلتلكم قبل كدة ...وإذ فجأة تطلع الشيخة هناء بالإسدال والمصحف وتشخط فيهم عايزة اقرة الورد مش مركزة منكم ...اتقوا الله..... ثناء تبصلها وتمصمص بشفيفها وبركاتك يا شيخة هنا ...أبقي قبليني لو نفعتي ، وهوووب اسيب كل الدوشة دي واطلع أنا بقي فوق السطوح ، شوية هوا يردو الروح وقاعدة روقان بعيد عن العيلة المجنونة دول .

الحنين إلي الماضي والنفور من الحاضر وبالعكس النفور من الماضي والتعلق بالحاضر ونسيان الماضي بالكلية ، وعندنا مثل من فات قديمه تاه واللي يبص وراه يتكعبل ، وفيه ناس زي ما قلت قبل كدة لا ليهم دعوة بماضي ولا بمستقبل ولا حتي بالحاضر وناس فوق الروقان ، في ناس عندهم حنين دائم للماضي شايفينه ديما احسن والدنيا كانت حلوة والناس صافية لبعضها والحاجة كانت رخيصة ده كانت العشرة جني تكفي البيت يومين ..أو أو علي حسب الفترة وخلاف كدة من الحكايات اللي بتوضح إن الماضي كان افضل من الحاضر ومن المستقبل وده علي حسب رؤيتهم همة ووجهة نظرهم والظروف اللي كانوا عايشينها ، وفي ناس تتكلم عن الماضي تقولك كان فقر ومرض وجهل الناس مكنتش لاقية تاكل والملك والانجليز كانوا خاربين البلد وبيثبتوا وجهة نظرهم بحكايات مضادة للحكايات الأولي واللي هية بتثبت كلامهم ، هية كدة الحياة .

طبعا الماضي مش في كل حاجة حلو ولا الحاضر في كل حاجة حلو لا بد من وجود منغصات في الحياة لكن هية بتبقي عملية تحيز لفترة معينة أو لشخص معين فبيحاول الشخص إنه يلمع الفترة دي ، طب يعني أيه يعني .

يعني إن الماضي دايما بوابة عبور للمستقبل ، يعني لازم تعرف الماضي وتدرس تفاصيله وتعرفه من مصادر صحيحة موثوق منها عشان تقدر تدخل للمستقبل والحاضر ، تعرف ايه هية نقاط الضعف والقوة وايه هية اسباب التفوق والسقوط ، دراسة الماضي مهمة جدا مش مجرد أن أنا احكي كنا وكنا وكنا ، ولكن ما هو حالك اليوم وبتفكر في ايه في المستقبل .

سلام بقي بينادوني حنزل اتعشي ...القاعدة مع الأكل حلووووووة