ياه ع الغصه اللي ف الحلق
وياه على اعوجاج الخلق
وناس ف اليمه تستاهل الحرق
لا تقولي حنظله و أبو لهب
كل النسوان شايله حطب
وكل العيون ماليها الجرب
حتى الصياح والبكا طرب
امتد السم لآخر عرق
كنت فاكر العمدان ضي قناديل
اتاري سواد القلوب زي الليل
الحب ف بلدنا مصلحة وتطبيل
حتى الاخوه غربا ودموع تماسيح النيل
أسامي ف بطاقه وع الورق
عمت مساء وزاد البهتان
بجدف ف أعاصير وطوفان
لا اتغير الإنسان ولا المكان
ومصاطب الغرب زي الشرق
وكسح ورشح وبلح
ازاي ف دنيا الهو تفلح
وازاي ممقوت ع المسرح
والموس ف الهري بيدبح
والأضحية كانت مجرد قلق
ع الورق حلمي اللي نما
بلغ النجوم وعنان السما
وف احضان الخيبه ارتمى
وصبحت جثتي متقسمه
وصاب ولا الايه عما
والحلم ف لحظه اتسرق
ع الورق بقلمي عبدالله رجب ابوعدنان
ليست هناك تعليقات:
إرسال تعليق