** الحاجة ناني وبنتها **
الواد حسين أبو دم حامي
ابن جارتي الحاجة ناني
شغال محامي ...
حلف على أخته ١٠٠ يمين
ما هي طالعة برة البيت يومين
قابلها في الشارع لقاها
قال حاطة بودرة في وشها
والبنطلون الجينز كان ضيق أوي
بين مفاتن جسمها ...
والشعر سايح ع الكتاف
والكعب عالي كأنها في حفلة زفاف
طبطب على أخته قالها
من غير كلام ....
بدل ما أجرك من شعورك
يلا أسبقي ...
ع البيت يا شاطرة إطرأي
الحاجة ناني شافتها راجعة قالت لها
مالك يا بيضة راجعة ليه ؟
ودمعتك فوق الخدود دي بتعمل أيه ؟
أياك يكون ابن الجيران عاكسك كمان !
ما أهو أصله واطي ما يختشيش
جربان وعامل فيها بيه وطالع له ريش
ودخل حسين ...
قالها يا أما أرحميني كنتي فين
ودي طالعة تعرض نفسها ....
قالت له إخرس وإختشي ...
أختك ما فيش في الدنيا أشرف منها
أختك خلاص كبرت وخراط البنات
ما خرطشي أحسن منها ...
كل البنات لابسين كده
علشان يجيلها ابن الحلال
اللي يقدر مهرها ...
ويكون صاحب أطيان ومال
أخدنا أيه من القعاد في البيت يا واد ؟
الواد صلاح ابن الجيران ....؟!
اللي امه جايه تترسم ...
وتقول معاه صانعة يعيشوا منها
زي الملوك ... يرحم أبوك
قولت لها قومي روحي
البت لسه ما عدهاش قطر الجواز
علشان يجيلها واد مشحم ريحته جاز
ولا اسماعيل ...
اللي إنت سارح بيه وعاجبك شغلته
وهو بيتهم لو في يوم هيزوره فار
ياخي يستجار ...
قام قال حسين ...
يا أما الجواز مش في الجهاز
يا أما الجواز ستر وغطا
وبيوت ماليها الحب والخير والسلام
فيها أيه يا حاجة ..
لو هتلبس باحترام ؟!
قالت له غور ..
وإياك على أختك يوم تجور
عايزها يعني يا واد تبور
ولا عايزها تعيش عيشتنا يا أبو الرجال
دا كلام عيال ...
بكرة يجيلها ابن الحلال
ويكون عريس ولا في الخيال
رد ابنها ...
يا أما اسمعيني وافهمي ...
وبلاش كتير تتكلمي ...
اللي هيجي يدق بابك
علشان جميلة ولابسة شيك
هيرميهالك يوم ما يلقى ...
واحدة أجمل في البوتيك
واللي بيختار واحدة صاينة نفسها
بيعفها .. ويصون شرفها وعرضها
يا أما حرام ...
تبقى أختي سلعة بتتعرض
اللي معاه يجي يشتري
وحرام أصرخ وأعترض ؟!
أختي هصونها دي جوهرة
ولا عمري يوم هرجع ورا
وبلاش نعيش في مسلسلات متفبركة
قومي يا حاجة وبخرينا بمستكة
وانتي يا أجمل مختلق
انتي بطبيعتك تسحري وتجنني
سبحانه ربي اللي خلق
أصل الجمال بيكون في روح
في طبع هادي يشدنا ...
في قلب مليان بالحنان ...
بيضمنا ويلمنا ....
عايزين نفوق ...
ونبص قدامنا وبلاش ..
نعيش حياتنا كلها باصين لفوق ....
ليست هناك تعليقات:
إرسال تعليق