الاكاديمية العربية المغربية للشعر والأدب

عُوْدَه والدكتورة جِيهان .. رواية / رضا الحسيني (10)

الفصل الثاني {في بيتنا عُوْدَه }

لا لا .. وعد مش هقول

_ بتعمل محشي و ملوخية بالفراخ

_ بجد يا جِيهان ! طب هروح أدخل عليها و أتأكد

.. يا ماما .. ماما .. انتي بجد بتعملي محشي ؟

_ أه منك يا جِيهان ، بقى كده ، كنت عاوزة أخليها مفاجأة  لعُوْدَة على الغدا

_ و الله يا أُمي هو وعدني يحفظ السر ، و أنا من طيبتي الزايدة

صدَّقته

_ هو فيه حد يصدَّق عُوْدَه ههههههه ، في المستشفى كلهم مش مصدقين إني ليَّا أهل .

_ انت ياحبيبي تقول براحتك اللي تحب تقوله .. بِنت ياجِيهان : سيبي عُوْدَه حبيبي براحته

_ شايفه ياجِيهان .. اتعلمي الحِنيه من ماما الحلوة

_ و الله أنا لازم أكلك هههههههههه

كان هذا النهار هو النهار الأجمل منذ سنوات على بيتنا الصغير الذي شعرت به صار كبيرا مُتسعا بروح عُوْدَه الجميلة .. و لأول مرة منذ سنوات أشعر بأُمي تضحك  هكذا من أعماق قلبها و روحها .. و كأن بيتنا استنار بضيٍ من عالم آخر .. و تحوَّل صمتنا الطويل لحركة و كلام و صار عُوْدَه يفعل ما لا نتوقعه و ما لم نكن نُصدق أبدا أن بيتنا سيعيشه .. فعلا صدقوا من قالوا مانراه شرا قد يكون هو منتهى الخير ..

فأنا و أُمي لم نكن سعداء حين علمنا أن بداية عملي بالقصر العيني ستكون المناوبة الليلية .. و حاولتُ كثيرا تغيير هذا الأمر بلا فائدة .. حتى أن أُمي قالت لي وقتها :

_ ما دام الأمر هكذا يبدو مستحيل التعديل فلعل الله قد كتب لك فيه

أمرا ما

_ و هل يكتب لنا الله مواعيد عملنا يا أُمي ؟! .. إنها أفعال بشرية لا علاقة لها بالقدر

_ غلطانة يا بنتي يا حبيبتي .. كل شيء يحدث في هذه الحياة و الكون كله هو بأمر الله .. و ما البشر إلا هم فقط أسباب ..

و كأن كل إنسان هو يدُ الله يجعلها تفعل ما يريده هو وحده

_ و الله يا أُمي يبدو كده إنك شِيخة و أنا مش عارفه

_ مش جايز فيه عريس بينتظرك في المناوبة دي

_ إيه ده يا ست ماما بقى ! .. انتي عاوزة تخلصي مني بالسرعة دي

و لا إيه؟!

_ جِيهان يا حبيبتي كل يوم من عمرك بيقربك من حياتك الجاية .. أنا اتعلمت كده .. القطار ما دام بيتحرك يبقى بيقرَّب من محطته الجايه

و هكذا وقتها وجدتني أفكر في كلام أُمي هذا .. لم  يكن موضوع العريس هذا يخطر ببالي أبدا .. و كيف يخطر ببالي و أنا أعيش حياتي كلها لا أهتم  إلا بدراستي حتى تخرجت و بدأت رحلتي العملية منذ الأمس .. عريس !..هههههه و هل بالفعل يوما ما سأصير عروسا ! لا لا هذا أمر بعيد جدا ..

_ سرحانة في إيه اعترفي بسرعة .

_ و الله بريئة يا شرطي .. كنت بس بفكر إزاي هبعد عن الولد الحليوة عُوْدَه طول الليل

_ ليه يعني ؟ هوحشك يعني ؟

_ لا لا لا  توحشني ده إيه يا سي عُوْدَه .. أنا بس هبقى قلقانة عليك .. بتاكل .. بتنام  .. بتلعب  ..  قاعد لوحدك  .. كده يعني

_ أه .. كنت فاكر هوحشك

_ و توحشني ليه يعني ؟!

و شعرت بعُوْدَه لحظتها و كأنه عاد لعالمه الذي كان يعيشه وحده قبل أن ألقاه .. و دون أن أشعر قُمت نحوه مُنقضَّة عليه ففزع و تكوَّم  في رُكن

و أنا مستمرة في ملاحقته أمسكه من كل مكان في جسمه و هو يضحك من فِعلتي هذه و أُردد:

_ أنا هاكل الولد ده .. سيبوني عليه .. محدش يحوشني لازم أأكله

_ الحقيني يا ماما .. يا ماما .. الحقيني .. جِيهان عاوزة تاكلني

فاكراني صباع محشي

انتظرونا غدا...  أنا وعُوْدَه والدكتورة جِيهان