قيل عيوبي...
بقلمي ابراهيم اللغافي
30-10-2023
قيل اعيوبي او لا زيد فيه
نقص اذنوبي او خمم مزيان
واش تقد تقول ل نفسك توبي؟
شوف كعبوبك او انسى كعبوبي
لكرويلة ماشية او لكلاب اوراها بانبيح
امشاها خلالهم لغبار او الريح
واهيا واه واهذاك! !!
لا تبقى دايرني تسبيح
قالوا لعايق حاضي لعايق
او لمدمدم قاضي حاجة
او انا قلت لمدمدم عايق
او لحاضيه فايق
او فيه تلات لفراجة
لفروج ف وقتو لايق
لخبار جارو ما سايق
اللي تقاقي هي ادجاجة
واش ما تقدرش ادير لفمك كمامة؟؟؟؟
رأسك حزمو بلعمامة
او تفكر يوم لقيامة
او لا تبقى دايرني تسبيح
او سعى واهيا للسلامة
اش خبار لبايت بلا عشى؟؟
قلالت ف عينيه الرمشة
خولت ف جلدو لهمشة
طريقو تبان مكمشة
او حتى عظم فيه ما رشى
ما قفقف ما فيه رعشة
ما بانت ف وجهو الدهشة
او دماغو والله ما امشى
ما واكل مسمن لا حرشة
ماداق كفتة لا كرشة
واااااش هاذ لفرشة؟؟؟
ايامو بلجراح مقمشة
او شاء ذياب عليه محرشة
واش هاذ الصورة؟
يا لميمة واهيا لميمة
قولي ليه يقيل عيوبي
او عيوب لغير
قولي ليه حنا كاملين ولادك
وينوض يشوف ما يدير
قولي ليه دمنا واحد
ويحاول يبدل التفكير
قولي ليه لهجتنا وحدة
أمتنا وحدة...قولي ليه
يا لميمة لحنينة
قولي ليه
بقلمي ابراهيم اللغافي
ليست هناك تعليقات:
إرسال تعليق