●●●●● عاجز عن التعبير ●●●●●
باحلم بحلم
وجوه حلمي باطير
لكن حقيقة عمري
شيء مالوش تفسير
قالوا الحياة حلوة
دايما ماليها الخير
جوه الكتاب ورده
بستان وفيه عصافير
وكأنها الجنة
وانتَ اللي فيها أمير
واهو عشنا جوه الكدب
ولا حد عنده ضمير
شيلنا الهموم بالكوم
وتعبنا من التفكير
وهم الأمل ماشي
واحنا وراه بنسير
اصل الوطن عربي
جرح العروبة غاوير
علمونا في المدارس
انشا وكلام تعبير
بالروح بالدم نفديك يا فلسطين
هللنا ويا الحلم وفرحنا بالتكبير
وشربنا كأس الدم على قسوة التفجير
صهيون بقى غالب ماشبعش من التدمير
ولا عادش فيه رحمة ماعتقش طفل صغير
مجنونة ايامنا بنحس بالتقصير
ملعونة أصنافنا إخوان على تكفير
والشيعي بيهلل والصوفي هام تذكير
متفرقين ألوان فعلا دا أمر خطير
عاش العرب عميان من الرقص والتحرير
فوقوا بقى يا جدعان ما زهقنا من التحذير
وانا في الحياه تايه
عاجز عن التعبير
●●●●●●●●●●●●●
شادوليات
شاذلي محمد عبدالرحمن حسين .
ليست هناك تعليقات:
إرسال تعليق