الاكاديمية العربية المغربية للشعر والأدب

غريب الأوطان 

وغربتى طالت.. 

فين الاهل.. فين القرايب 

فين راحوا.. الحبايب

امتى اعود... 

وفى قلبى حزن.. 

بكى الناي والعود 

امتى اعود.. 

ارسم خطاوي الأمل 

وطريق ممدود 

ويا بكرة يالي جاي 

هات معاك الأمان 

هات الحب فى كل مكان

هات ناس بتوفي وتخلص

اقدر افرق  

مين صان.. ومين خان 

الشمس غابت.. تاه القمر 

الليل ظلام.. عتمةو غيام 

الشعر شاب قبل الأوان 

آه من غربتى.. آه من دنيتى.. 

ليه الضحكة مش مرسومة 

ليه مكتومة 

ليه الحزن دايما حابس فرحتى.. 

واه من غربة الأوطان.. 

آه من غربتى..

مين يمسح دمعتى.. 

مين يحس بالانسان.. 

وفى قلب كل إنسان.. وطن 

لحن ومغنى وشجن 

نفسي اعود.. 

وفى غربة البعيد 

القريب زي الغريب 

كل شيء هان.. 

احلام.. وامانى.. وطموح

مدبوح بالشقى.. وكلام مغشوش 

فين راح الوش البشوش.. 

اتاريني كنت مغشوش..

لما حلمت.. 

وحلمى كان فى العنان.. 

حابس دموعي جوه الجفون..

عمره ما هان او يهون 

ووطنى يصرخ فين ولادي.. 

فين راحوا.. من وادى لوادى.. 

جايلك يا وطن.. يا اجمل الاوطنان.. 

مهما ابعد او اغيب.. 

انا منك قريب 

لو دموعى تجف.. او شعرى يشيب 

انت الحضن.. انت الحبيب 

يا وطنى.. يا أجمل الأوطان.. 

غريب الأوطان..بقلم يحيى المنياوى