دخلت لسوق النسا قالو كله اعراس وافراح
وقلت فيه همومي ننسى ويهنى بالي ويرتاح
بين صباح ومسى وبين عشية وصباح
لقيت حقي مشى وراس مال ورباح
وسولت على مول الراي ولشوار
لقيتو فالزنقة تلاح
فزمان غريب الأطوار
فيه كلشي تباح
والراجل مول الراي ولشوار
تلف ونسى كل ماقرا فلواح
فدنيا عجب هي وأسرار
الحدجة فيها كليناها تفاح
دخلت لسوق النسا بنهار
وقلت نجيب شي دورة
فالدخلة لقيت ورد ونوار
وفالخرجة لقيت حفرة محفورة
سولت على مول الراي ولشوار
قالو ردموه دفنوه فمثمورة
سولت لعدول وسولت العطار
جاوبوني هوما بمعيورة
ومشيت لحلقة المداح
نتفرج ونسمع أمداح
وسناني تمضغ حدجة تفاح
ووذني مع كلام المداح
يا سيادنا الملاح سمعو حكاية مدينية وفلاح
حكاية عجيبة وغريبة تشبه حكاية الضبع والديبة
من الكوشينة والكانون صبحات تفتي فالقانون
وسمعها الصمك وكلمها الزيزون
وكلمة قوامون دارو ليها الصابون وزلݣت ولعبت الرطاوى
والمسكين تهرس وسكت وقطع الحس
وظهرو عواج قوس وزادوه هراوا
يا سيادنا يا حضار يا اهل السمع لخيار
هادي عروسة مدينية وعريس فلاح
فزمان كلشي فيه تباح والرأي ولشوار فالزنقة تلاح
لعدول جاب كتلة مدونة مختومة بسنية مزيونة
كتبها ليه فورقة ملونة وعلقوها فسوق الشاري والبياع
وحق العريس راه تباع ودمعو نشف مابقى يسيل
شلخوه تشلاخ الدلاع فسوق الحݣرة والويل
وتمر الهيبة طيحوه بمقلاع
والحق اغبر قلب عليه بشمعة وقنديل
يا سيادنا يا حضار يا اهل السمع لخيار
سالات لحكاية وندلي الستار
على حكاية فين زمان شمشام بن بعباع
أل حقو قالسوق تباع
فين شمشام بن بعباع
فين مثنى وثلاث ورباع صبحات غير كلام وقيل
حلم وكان وضاع حلم غير فمنام الليل
فزمان صعيب الأوضاع فيه الحال مابحالو حال
ما بحالو مثيل
عبد اللطيف ميصر 5 7 2023 المغرب
ليست هناك تعليقات:
إرسال تعليق