♥♥شهر البركه♥♥
هليت ياشهر الصيام
بالحب والنفحات
ياهدية العلاَّم
ومقرَّب المسافات
يامجمَّع الأحباب
والأهل والخلاَّن
ياريت كل الشهور
يبقى اسمهم رمضان
يبقى اسمهم رمضان
ياشهر كله سماح
نهاره فيه تسبيح
ورحمه م الفتاح
وليله فيه تراويح
فجرك عبير فوَّاح
ياهدية المسلمين
من القوى الرحمنٰٔ
ياريت كل الشهور
يبقى اسمهم رمضان
يبقى اسمهم رمضان
هليت ياضيف وخفيف
يامقوى كل ضعيف
فيك نوَّرت دارنا
ياغنى عن التعريف
فيك اُنزل القرآن
على النبى العدنان
ياريت كل الشهور
يبقى اسمهم رمضان
يبقى اسمهم رمضان
ياشهر كلك خير
هليت ياشهر النور
الرزق فيك بيزيد
والبركه تملا الدور
ويتكتف الشيطان
ونحس فيك بأمان
ياريت كل الشهور
يبقى اسمهم رمضان
يبقى اسمهم رمضان
~~~~~~~~~~~~~
الشاعر /عصام رزق
من ديوان أنا والليل
تحت الطبع
ليست هناك تعليقات:
إرسال تعليق