الشاعر صبرى عبد الواحد الحساني
غضب الشاعر
اياك تزعل شاعر
كلامه شديد وواعر
كلامه زى الرصاص
بيضرب فى المشاعر
بيهد بكلامه جبال
يفوق الجيش والعساكر
يخلى البحر ناشف
والغايب يبقى حاضر
والأرض تغلى تحتك
والمطر بالنار ماطر
والأكل ما ليهوش طعم
وما تعرفش انت صايم ولا فاطر
وتتوه وسط الزحام
وحياتك تبقى مخاطر
غضب الشاعر
اياك تزعل شاعر
وتقول ما يهمنيش
هتقول يا ارض انشقى
ودارينى ما تظهرنيش
وتشوف الميه نار
وتصرخ وتقول ما تحرقينيش
وتمشى وشك فى ضهرك
وانده عليك ما تسمعنيش
والقطه تشوفها اسد
وتقول ما تأكولنيش
اياك تعادى شاعر
وتقول اعلم عليه
هتكون فى أيده لعبه
ومش هتقدر عليه
الشاعر سيفه قلمه
دايما ماسكه فى ايديه
بكلمه ممكن يدبح
وشايل روحه فى ايديها
غضب الشاعر
الشاعر ما بيخافش من حد
غير ربه اللى خلقه وسيده
يخوض حروب وحروب
علشان ياخد ما يريده
ما فيش حد عليه كبير
ولا شىء يوجع إيده
اياك تعادى شاعر
ده العند ببجرى فى وريده
غضب الشاعر
ويا بختك لو شاعر حبك
تلاقيه بروحه فداك
يبيع الدنيا عشانك
ويكون السعد معاك
هيكون ليك نعم السند
فى وشك وفى قفاك
ولو الدنيا جات عليك
تلاقيه واقف معاك
يحب ليك زى ما يحب لنفسه
وهواه يجارى هواك
الشاعر لو يوم حبك
استحالة تانى ينساك
ولو حطك يوم فى قلبه
يعادى من عاداك
واللى فى أيده اعتبره
بتاعك وفى يداك
الشاعر قلب حنين
وكلامه فيه دواك
أنا شاعر ولو حبيتك
هتكون روحى فداك
أنا شاعر ولو حبيتك
هيكون يا سعدك ويا هناك
شاعر بنى هاشم/,صبرى عبد الواحد الحساني
ليست هناك تعليقات:
إرسال تعليق