------------------------------------------
بردان و بتبكي كماني يا صغير
لا بيت عندك لا غذا حتى و حصير
ما عندكم بالبيت دفاية حطب
ولا بكهربا تدفيك وقت الزمهرير
و يمكن يكون البرد أحلامك شطب
و خّلّّاك واقف عند تلجاتو أسير
مهما البرد يقزقز و جسمك عَطَب
لا بد إلا عالدفا تْجِــد المسير
عم تِرجف من البرد ما عندك حْرَام
ممكن تقوللي وين إنت عم تنام
لمين عَمْ تشكي همومك بالحياة
شايف بنظراتك وجع دامي و ألام
صمتك نِــدا مجبول آهات و أهات
صمتك بلاغة معنونة بأفجع كلام
إصرخ و عللي الصوت في عزم و ثبات
حتى يذوب التلج و يبان الخزام
كل طلعة في لها نزلة أكيـد
مش رح بتبقى بالدني معتَّـر وحيد
مع كل ليل بينجلي.. بيطلع نهار
و بيصير عندك بيت و يذوب الجليد
يا صغير لا تيأس و لا يصيبك دمار
و لا تقول بدو الفقر عا فقرك يْزيد
و كل ورقة زاد فيها الإصفرار
بيخلق ورق أخضر بدالا عن جديد
بكيتني يا صغير كفكف مدمعك
الناس كلها شايفي و بتقشعك
تبسّم ما تبكي حْرَقِت قلبي بالبكا
إحكي شو بدك كِليتنا منسمعك
الطِّيب من تمك بيطلع لو حكى
إفرد صبيعك ليش لاوي إصبعك
و طالما لرب الكائني دمعك شكا
يا صغير بدها تُفْرَج و الله معك
الشاعر د. علي مسلم عجمي
لبنان
ليست هناك تعليقات:
إرسال تعليق