""""""""""""""""
العمر بيعدى
قطار مابيهدى
والدنيا دى محطات
وحياتى مابيدى
صحيح كتير عثرات
فيه خير وفيه نزوات
حسن الختام يارب
ياغافر الزلات
قطر السنين يجرى
ماشى سريع دوغرى
عمره مايستنى
والاسم له مجرى
فوق يلا ياانسان
وإياك تكون غفلان
ارجع لبارى الكون
منه اطلب الغفران
سنين وعشناها
كان فيها حلو ومر
كانت يامحلاها
ايام كانت بتغر
دلوقتى عدى العمر
وشيخوخة هى أمر
يارب سبحانك
ارحم ذليل م القهر
فك الكروب ياكريم
وخلى عطاءك نهر
رمضان دا له تكريم
عندك دا افضل شهر
والعمر بيعدى
قطار مابيهدى
وانت السند والعون
يارب كن سندى
بأمر كن فيكون
تهدينا ونعدى
""""""""""""""""""
جمال على الشرقاوى
شاعر العامية
مليج منوفية
ليست هناك تعليقات:
إرسال تعليق