بقلمي م / يحيى المنياوي
------------------------------------------
ولسة باقي في العمر
تاني نقول آهات
متلجمين متغمين بالسكات
ماشين ورا ضلنا..
أتاريه مش ضلنا
كان بيضلنا
لطريق نهايته ممات
خٌدوا كل شيء
ورجعولنا القيم....
د احنا العروبة
وده من طبع الشيم...
وبالعزيمة ياما حققنا الإنجاز
زمان على لمبة جاز
كنا بنرسم طريق حلمنا..
نغزل خيوط الأمل
طبلية واحدة تلمنا
الحلم كان حلمنا..
مش ناس من بعيد تحلملنا
كل هدفهم يخربوها...
تحت أي مسميات..
رجعولنا تاني أخلاقنا
وضميرنا الي مات
بيقولنا موضة ولغة العصر
هدوم متقطعة.. وأخلاق متمزعة
العورة بانت.. ضهر وخصر
رجعولنا زمنا الي فات
شياكة.. ولباقة.. وحياء
رجعولنا لغتنا العربية..
هى أصل الحياة
حروف من نور وشمس الأصيل
ننطق بصوت قرآن... انجيل
ليه نتكلم كل اللغات.....
رجعولنا الحب..
في قلوب العاشقين
رجعوا الصدق..
على لسان الصادقين
ليه حياتنا مليانة بالكدب
مهما نحلف ميت يمين
وف طريق التوهة و التوهان
جيل بحالوا قال آمين
خُدوا كل شيء
ورجعولنا روح الإنسان
رجعولنا أيادينا المتشبكة
لما ينده وطنا علينا
بأرواحنا كنا ملبين
ليه من ملامحنا فرقتونا
جهل وفقر بالملايين
إبن وزير وإبن غفير
وإبن معدوم الهوية
معدوم الصفات
تحت اي مسميات
انتوا ف خرابها اسطوات
بلاها حداثة.. بلاها عولمة
بلاها نموت
ف أكفان مقلمة ملونة
بلاها موضة مايعة
تايهة وضايعة
بأحلام شباب وبنات
رجعولنا تاني....
الزمن الي فات
رجعولنا تاني...
الزمن الي فات
___________________________
ليست هناك تعليقات:
إرسال تعليق