بقلم ( أيمن نصر )
******************
مش قولتلي يا والدي
دنيتنا دي وردي.
وناسها ف قلب الجوامع
معتكفه بتصلي.
ما حد فيها بيحكي
غير في الصلاه والصوم.
والظلم فيها إختفى
والعرف فيها الوفا
ومافيهاش ولا مظلوم.
و قولتلي بردوا
الشياطين خرجوا
والعدل فيها حكم
ومفيش ولامحروم.
دخلتها برجلي
و ضحكت من خيبتي
لما صحيت من النوم.
لقيتها مش دنيا
لكن أكيد أقرب
للطوفان تكون.
والغرقانين فيها
فاقوا اللي عرفوا العوم.
لقيتها أقرب لغابة
وناسها زي الديابة
زي الصقور بتحوم.
بتحلق ع الضعيف
الغلبان المحروم.
و تنهش في لحمه يا آباه
و يشيلوه هموم.
والعدل اللي حكتلي
إنه هيسود في يوم.
لا لقيته ولا شفته
بقى حلم المظلوم.
ليه بس يا والدي؟
ليه تسيبني متغمي ؟
وارجع وأنا المهزوم.
ده الحب كان مطمعي
والعدل كان سيفي
أنهي بيه الهموم.
خليتني ليه أحلم
بناس كما البلسم.
إبليسها متلجم
لا يفوت ولا يحكم.
إيه العمل قوللي
يا حبيبي يا والدي؟!
أحلامي بالدنيا
طلعت سراب معدوم.
دلوقتي انا عايش
زي الغريب مصدوم.
بناس شياطينها
تملي سابقينها
بيزودونا هموم.
إزاي هعاشرها
واخلاقهم كارهها
ويا عيني ع المحروم.
يا ريتني أبدلهم
أو أغير طبايعهم
لملايكه تطير و تحوم.
أو حتى أطهرهم
دي ذنوبهم تغرقهم
أد الجبال بالكوم.
والغلبانين في الكون
ايه يعملوا يا آباه
وسط الغربان والبوم.
سامحني يا والدي
العيب ماهوش منك
العيب في ناس بالكوم.
باعوا ضمايرهم
و نسوا آخرتهم
بيشيلونا الهموم.
متزعلش يا والدي
أفكارك الوردي
هاحفرها في عقلي
حكمه لكل يوم.
وهادعي لشياطنها
بهدايه تهديهم
تطهرهم تنجيهم
قبل ما القيامه تقوم.
بقلم ( #أيمن_نصر )
دمتم في رعاية الله.
ليست هناك تعليقات:
إرسال تعليق