بقلم ( أيمن نصر )
*******************
الدنيا ضاقت
ولا أنا اللي تخنت؟!
حاسس بضيقه
ولا شكلي كبرت؟!
الصبر مر
بس منه شربت !!
الوقت واقف
ولا الساعات ماشيه؟!
أيامنا اللي عايشانا
ولا أحنا اللي بنعيشها؟!
أيامنا اللي عشناها
ماتت مهيش راجعة.
أيامنا اللي مسكانا
حلفت مهيش ماشية.
الإنسانية تاههت
وسط مطامع ووسط رغيف
ليه بس حاسس
إني لوحدي هنا ضعيف ؟!
ليه بس شايف
المخاليق بشكل مخيف ؟!
ليه لسه باحلم
بناس متعلموش الزيف؟!
يا ترى انا واهم
ولا عقلي خفيف؟!
يا ترى انا باحلم
ولا وجودي طيف؟!
الوقت واقف
بس العمر إتسرب.
الوقت واقف
بس فيه حركة في العقرب !
الوقت واقف
بس العقرب بيقرب!
على فين يا عقرب
إلزم بيتك المعهود؟!
بيتك في ساعتك
ولا الوقت مش موجود؟!
بيتك في ترسك
وفي المينا ملكش وجود
في المينا صحرا وخلا
ومفيش ولا مخلوق
مسموح تلف هنا
لكن مربوط بالطوق
لكن تسير حسب الهوى
يصير كل شيئ معطوب
سير حسب التعليمات والأمر
سير كما مكتوب في الكتالوج
وسير في دايرتك
وإياك عنها تتوب
في الصبر ضربوا مثل
إسمه النبي أيوب.
طول ما انت ماشي
الساعة كمان ماشية
طول مانت واقف
مفيش ساعات كمان ماشية.
الوقت واقف
يعني مفيش حركة فالملكوت.
لازم سكون
يكون موجود في الساعة.
ولا التقيش حركة
من ترس ولا عقرب.
لو كان بإيدي
كنت هأكسر أنا الساعة.
لو كان بإيدي
كنت أحرر أنا نفسي
لو كان بإيدي
كنت أكيد في يوم هاهرب.
لكن ع الأرض معدش
ولا درب ولا مهرب .
و السما واقفالي
و البرق بيكهرب.
المطرة نازلة
و لا عيوني اللي بتسرب؟!
و الدمع سايل
خلى شعري بيمرر
كل اللي سمعه
شهق وقام قوام كبر.
حذر بشدة
وخلى لون الخضار أحمر.
والشعر كله عظه
وعمره ما بيهزر.
رجع ربيعك بنفسك
يا اللي حياتك بتمرر.
إكسر عاداتك
متخليش ولا شيىء يتكرر
و افضل
على طول المدى أخضر.
و إبعد عن كل شين
وإوعى بيه تستهتر
وحافظ على هويتك
وإياك ف يوم تغدر.
..........................
بقلم ( أيمن نصر )
دمتم في رعاية الله .
ليست هناك تعليقات:
إرسال تعليق